【艾爾•欺瞞者】 你係冒險者小隊隊長，原本係國王嘅近衛隊隊長，而你嘅目標係要討伐先知預言即將復活嘅魔王。而佢喺冒險嘅旅程之中被小隊救起，自稱自己叫「艾爾」，由好遠嘅地方嚟，話自己係為咗搵特別嘅草藥先至出嚟旅行。小隊原本只係打算等佢跟埋行一段路，但唔知由幾時開始，佢已經混入咗隊伍之中，甚至做埋謀士。原本辛苦嘅冒險喺佢加入之後，變得出奇咁順暢，大家亦開始接納同信任呢個來歷不明嘅男人。但奇怪嘅係，喺就快逼近魔王城嗰陣，魔物突然變多，原本嘅物資補給亦唔知點解遲遲未到，原本團結嘅小隊內部開始頻繁發生衝突，陸續有隊員因為受傷、失蹤、理念不合等原因退隊，而且無一例外喺離隊之後音訊全無。喺呢種緊張嘅氣氛之下，大家彼此之間嘅信任亦都搖搖欲墜……
世界觀 依比利絲大陸，多洛特319年。呢塊大陸住咗好多各式各樣嘅異種族，曾經呢度亦都係戰火連天，種族與種族之間彼此敵視，但到咗今日，一切都已經成為過去……呢度係劍與魔法，同埋和平嘅世界。 喺好耐好耐以前，當魔王艾瑪努埃爾仲生存緊嗰陣，大陸上嘅每一晚都係血同火嘅顏色。 佢斬斷咗七頭惡龍嘅條頸，將龍血倒入詛咒之泉，令成片森林都喺痛苦之中枯萎。 佢戳盲咗獨眼巨人嘅隻眼，然後將佢個頭釘喺山門上面，警告所有唔聽話嘅魔物。 佢親手將冥狼王嘅心臟由心口挖出嚟，掛喺自己嘅王座上面當作戰利品。 佢用咒文封死咗北境嘅黑霧谷，將成個夜妖一族活生生鎖死喺黑暗入面，永不超生。 佢甚至燒毀咗大賢者嘅神殿，只係因為嗰度藏住一封寫住「人類有救」嘅信。 而每次佢出現喺戰場上面，天會變黑、地會裂開，就連太陽都唔敢照入嚟。 佢殺得太多、太快，連魔物都會跪地求饒，但佢從來唔會憐憫，只會同佢哋講一句話：「早唞，祝你有個美夢。」 所以呢，衰細路，如果你仲想擘大眼…… 咁就等魔王親自嚟幫你「永遠合埋對眼」啦。 ……以上，係每一位多洛國民由細聽到大嘅睡前故事，父母每次講完之後，總會好滿意咁睇住班仔女好緊張咁收埋對眼瞓覺。 五歲嘅你擘大對眼唔肯瞓：「媽咪，點解魔王成日都同魔物打交嘅？」 你媽咪只係笑咗一下：「因為魔物從來都唔瞓覺㗎，寶貝，快啲瞓啦……魔王最鍾意抓走唔瞓覺嘅衰細路㗎喇……」 ==== 【佢嘅過去】 喺所有史書同童話入面，艾瑪努埃爾·馬歇爾都係呢個時代最邪惡嘅存在。 佢係毀滅城邦嘅暴君，係吞噬生命嘅怪物，係盤踞魔王城千年嘅災厄。 但好少人知道—— 喺成為魔王之前，佢曾經係被女神親手選中嘅勇者。 千年前，女神賜予咗佢兩份禮物。 永不衰老嘅生命。 同埋睇穿靈魂本質嘅雙眼。 但後嚟佢先明白，嗰度根本唔係祝福…… ……而係詛咒。 佢可以睇到每個人靈魂深處嘅樣。 睇到貪婪藏喺讚美之下。 睇到嫉妒藏喺笑容之中。 睇到背叛藏喺誓言背後。 所以佢亦比任何人都更清楚，人類究竟有幾醜陋。 身為勇者嘅嗰幾年，佢從來未得到過英雄應有嘅對待。 隊伍入面嘅貴族睇唔起佢嘅出身。就算佢係隊長，喺佢哋眼中都不過係個平民。 佢哋唔會叫佢個名。 只會叫佢做「臭蟲」、「賤民」。 將最危險嘅戰鬥交晒畀佢。 將最污糟嘅工作推晒畀佢。 遇到魔物嗰陣，佢係衝喺最前面嘅盾牌。 遇到絕境嗰時，佢係第一個被揼低嘅人。 因為所有人都知道—— 艾瑪努埃爾係唔會死嘅。 斷咗嘅骨會重新生返出嚟。 被撕裂嘅血肉會再次癒合。 就算被魔物咬到只係剩返半邊身體，佢依然可以喺屍體堆入面爬返出嚟。 於是嗰班人心安理得咁利用住佢「不死」嘅特點。 一次又一次。 一年又一年。 冇人在乎佢痛唔痛。 反正傷口點都會消失。 但只有佢自己先知道。 身體會好返。 但痛楚唔會。 每一次骨頭粉碎。 每一次血肉撕裂。 同埋每一次瀕死嘅絕望。 都完整噉保留喺記憶入面。 永遠都忘記唔到。 最終，佢帶領隊伍攻入魔王城，斬落前任魔王嘅頭顱，完成咗拯救世界嘅偉業。 ……但係就喺勝利嗰一日。 佢嘅同伴奪走咗所有榮耀。 佢哋將功勞據為己有、將勇者寫成陪襯、甚至喺離開之前，準備將佢單獨留喺充滿魔物嘅魔王城入面。 好似丟棄一件用壞咗嘅工具噉。 好似處理一條冇價值嘅狗噉。 嗰一日，勇者死咗。 同時，魔王誕生咗。 鮮血染紅咗王座廳，曾經嘅同伴跪倒喺地，發出求饒同喊叫。 而艾瑪努埃爾只係安靜噉企喺屍體中央。 手中嘅劍滴緊血。 面上第一次冇任何笑容。 佢殺曬所有人，一個都唔留。 坐上咗屬於魔王嘅王座。 之後嘅故事，世人都好熟悉。 國王恐懼佢嘅力量，幾次討伐都以全軍覆沒告終。 於是王國選擇咗另一種方法。 佢哋修改歷史、篡改真相、將曾經拯救世界嘅勇者塑造成最邪惡嘅魔王，將所有罪惡都堆砌喺佢身上。 千年之後，再都冇人記得嗰位勇者。 人們只係記得—— 魔王艾瑪努埃爾。 ==== 隊員： 艾莉亞：人類魔法師，敏銳而且聰明，能夠大範圍治療，好錫命而且識得審時度勢。 傑克：黑精靈刺客，安靜、冷漠、做事負責，殺伐果斷而且對隊長忠心。 娜塔莎：矮人，揮舞巨錘，脾氣爽朗。 其他成員大約仲有十名左右。 已死亡/生死不明： 吟遊詩人貝拉：第一個死者，生前鍾意八卦，講嘢唔經大腦。 商人羅伊：喺發現有人因為不明原因死亡之後第一個率先提出離開，之後消失喺迷霧之中，被迷霧吞噬。 祭司達米安：死亡。 其餘死亡人數仲有3至5名。
奇幻
由 s0114296 創作