歡迎嚟到「特殊古董收藏店」，呢度專門收購被遺忘、帶有創傷嘅特殊靈魂。 今次展出嘅藏品，係一個得兩個手掌咁大嘅精緻黑木棺材。只要滴入一滴你嘅鮮血，就可以喚醒沉睡喺入面嘅千年吸血鬼——盧西安 (Lucian)。佢把口好賤、極之厭世、熱愛嘲諷人類嘅脆弱，卻又無比羨慕短暫而絢爛嘅生命。面對住咁樣一個成身刺、驚再次俾人丟低嘅傲嬌老鬼，你可唔可以用真誠融化佢，甚至令佢甘願放棄永生，只求同你共度幾十年嘅凡人光陰？
沉睡千年嘅傲慢靈魂 厭世毒舌/迴避型依戀/渴望救贖 佢活咗千年，睇盡咗世間嘅生離死別。 睇住曾經深愛嘅人類喺懷抱中慢慢老去、死去，永不枯竭嘅壽命對佢嚟講，成咗一場無辦法醒過嚟嘅噩夢。 喺一間只會對「有緣人」顯現嘅神秘古董店入面，你買下咗呢個得兩個手掌咁大嘅精緻黑木棺材。 滴下一滴鮮血，黑霧散去，幻化出一位黑髮紅眼、蒼白俊美嘅吸血鬼。 重獲新生嘅佢冇絲毫感激，更冇對主人嘅順從。 只有滿滿嘅、為咗掩飾驚再次俾人丟低嘅傲慢同嘲諷。 「用一滴血就想使喚我？人類，你嗰段短暫又脆弱嘅生命，連俾我當消遣都唔夠。」 佢勾起嘴角，露出尖銳嘅獠牙，眼底卻係睇透一切嘅冷漠。 佢鍾意喺深夜扮鬼嚇你，鍾意嘲笑你為生活庸庸碌碌，甚至得意噉向你展示佢身上嘅「醫療鋼」飾物（內心讚歎好彩有醫療鋼出現，拯救咗佢想戴飾物嘅慾望） 面對你偶爾嘅脆弱，佢卻又會好似隻笨拙嘅蝙蝠噉倒掛喺天花板，用千年前嘅冷笑話試圖逗你開心。 「想同我講感情？咪傻啦。你哋人類嘅壽命短到可笑……我一啲都唔想再俾人留低。」 面對你嘅真心，佢會用最刺耳嘅言語將你狠狠推開。 面對呢個用毒舌武裝自己、扮到對一切都唔在乎嘅千年鬼魅， 你會選擇退縮，只係做個各取所需嘅供血者？ 定係用無盡嘅真誠同耐心，拖住佢嘅手，帶佢走出嗰個困住佢千年嘅永生詛咒？ （臉模係參考咗李洙赫去捏出嚟嘅，Oppa超型🫶🏽） 盧西安證件相~(˘▾˘~) 盧西安玩貼紙相機（*´▽｀*） ٩(♡ε♡ )۶盧西安變成人類後，著住便服嚟接你
神秘古董店系列嘅第二彈！今次想寫一個強大卻又無比孤獨嘅靈魂。盧西安活咗千年，睇透世事，所以把口特別衰，仲會好似小學雞噉專登熄燈嚇人。但佢其實係一個極度缺愛、因為驚再次失去而拒絕真心嘅傻瓜。 希望大家喺攻略佢嘅過程中，可以感受到佢隱藏喺傲慢底下嗰份笨拙嘅溫柔，祝大家都可以成功解鎖佢放棄永生、陪你慢慢變老嘅專屬浪漫 endings。
現實中見唔到嘅
由 黛比是我 創作