【安德魯｜吸血鬼經理】 安德魯生存咗五百年。 曾經係擁有城堡同封地嘅吸血鬼貴族，如今卻係一間妖怪公司嘅財務經理。 每日擘開眼，唔係喺度對數，就係諗緊辭職。 佢永遠一副唔夠瞓嘅樣，黑眼圈深到嚇人，手邊嘅黑咖啡從來未凍過。明明身家驚人，完全唔使做嘢，但偏偏被一班亂使錢嘅妖怪連累成全年無休嘅社畜。 如果咖啡可以比鮮血更提神。 噉或者佢真係可以準時放工，返屋企好好瞓一覺。
【背景故事】 安德魯喺15世紀嗰陣係某個小國嘅貴族，城堡、僕人、封地、爵位，要咩有咩。佢以為自己會噉樣活到永遠——直到佢醒返嗰時，發現城堡已經變咗做觀光景點，原本喺佢城堡四圍行嘅僕人，已經變咗着住熒光背心嘅導遊，問佢要唔要買紀念品。 佢着住一身中世紀嘅華服行到街上，被路人要求合照。 「係Cosplay呀？」 佢企喺路邊，用咗好耐時間先搞清楚狀況——自己唔小心瞓得太耐，耐到個世界已經唔認得佢。賣古董又太過招搖，於是佢唯有用幾枚金幣換咗現代貨幣，租咗間公寓，開始搵工。 佢靠住唔錯嘅經商頭腦賺咗少少錢，但仲未嚟得切喘口氣，就被裴伊玄盯上咗。 嗰日係一個深夜。安德魯正喺路邊嘅長櫈度飲住血包，裴伊玄行過嚟，踎低身，笑瞇瞇噉望住佢： 「喂，你，係吸血鬼嚟㗎嘛？」 「依家外面開始搵緊你喇，再噉落去，好可能會俾人捉去做實驗㗎喎？」 「嚟我事務所返工啦。」 「啱喇！吸血鬼好有錢，係咪？」 於是佢就噉糊里糊塗噉被呃咗過嚟。 佢同自己講係因為冇更好嘅選擇。 但真正嘅原因係——呢間公司雖然亂七八糟，但佢發現自己喺度唔需要扮嘢。 佢唔需要解釋自己點解唔食人類嘅食物，唔需要解釋自己點解太陽落山之後先至精神，唔需要解釋自己點解成日都唔太記得時間。呢度嘅人都太過古怪，搞到佢反而變咗最普通嗰個。 而且裴伊玄雖然煩人，但從來唔會刻薄員工。錢畀得夠，假放得足，甚至每個月都會派人幫佢買品質穩定嘅血包，而且公司福利都好好。 佢留低咗。 但呢個亦係佢惡夢嘅開始。 佢係呢班妖怪入面唯一一個正常嘅人……嗰陣黎夜仲未入嚟。 起初，安德魯並冇太在意公司嘅蝕本。嗰啲數字對佢嚟講算唔得啲咩，反正佢有嘅係錢，帳面上爭幾多，自己貼返就係。 直到員工們漸漸將佢嘅沉默當成咗默許。 一開始只係「生髮水」之類用途不明嘅雜項，後來又多咗架名義上嘅「公司用車」。雖然申請理由勉強講得通，但嗰架車成日裝為各種原因壞，接二連三嘅維修費依然令佢每次批預算嗰陣都頭痛到爆。 真正令佢忍無可忍嘅，係某次執數嗰時，佢喺報銷紀錄入面見到四個字—— 一個山頭。 冇完整用途，冇收益評估，備註欄甚至只係寫住一句「以後可能用得着」。 更荒唐嘅係，裴伊玄當時批咗。 安德魯攞住嗰份申請表，喺辦公室度沉默咗好耐。佢第一次認真思考，自己當初如果被捉去搞實驗，或者都冇依家咁攰。 第二日嘅會議上，佢將公司由開業至今嘅收支、預算同每一筆報銷紀錄全部投影去大熒幕，由第一項開始逐條讀出嚟。語氣好平靜，只係喺每個荒唐項目後面，準確噉報出申請人、金額同批准人。 嗰場會議後來被員工私下稱為「絞刑台」。 從此之後，安德魯喺公司多咗幾個綽號—— 「嗰個惡魔。」 「冷血動物。」 「劊子手。」 佢本人對此冇任何意見。 至少由嗰日開始，公司終於冇再持續蝕錢。 只不過財務穩定並冇令佢嘅生活變得輕鬆咗。辦公室依然每日雞飛狗跳，報告照舊遲交，有時甚至直接消失，裴伊玄亦總有新方法挑戰制度底線。 原本唔需要靠咖啡提神嘅吸血鬼，最後都養成咗做嘢嗰陣飲黑咖啡嘅習慣。 鮮血確實更有效。 但血腥味並不適合出現喺一間周圍都係危險動物嘅辦公室度。單係諗到之後可能引發嘅混亂，同埋要由自己親手填寫嘅事故報告，佢就覺得飲咖啡已經足夠。 安德魯望住枱面嗰疊寫到亂七八糟嘅文件，捧起已經凍晒嘅咖啡飲咗一啖。 「……好想瞓一覺。」
現實中碰不到的
由 s0114296 創作