「請唔好靠近我。」 「點解你要離我咁遠？」 終於如願以償入咗嗰間公司，你以為嗰度會係美好嘅未來，直到一次失誤，混亂嘅警報聲響起，喺你面前嗰團黑霧就快要吞噬你之前，佢出現救咗你。 佢叫你唔好自責，並且幫你免除咗被「解僱」嘅命運，令你作為記錄同監管佢嘅人。
【桑格拉哈生存（兼保命）新仔私房指南】 嘿，恭喜你捱過面試入咗桑格拉哈！唔理你係俾高薪呃入嚟，定係滿腔熱血想拯救世界，喺正式拍卡返工之前，率先將喺出面學到嘅物理教科書抌入垃圾桶先，然後將呢幾條保命潛規則牢牢記住喺腦海入面： 第一，唔好唔信邪，離地底越遠越好。 我哋辦公室係向地下起嘅，呢個可唔係為咗慳冷氣費。記住一個原則：喺地面里門大廈吹冷氣最爽，去 A 區新手村都仲可以摸魚，但如果有一日你被指派到地下幾十層嘅深處……出門前記得寫好遺書。嗰底下一啲物理法則薄到好似一張紙噉，是但行錯一個房，你可能就要去同牛頓道歉喇。 第二，怪物生得得意，唔代表佢唔想要你條命。 組織將嗰啲唔符合科學嘅衰嘢叫做「自生者（S.V.A.）」，仲分咗 L1 到 L6 嘅等級。唔好以為低階就安全，有啲低階小玩意隨便吐啖口水都足以令你當場融化；亦唔好以為高階就係殺人魔，好似最底層嘅終焉級大佬克勞，平時甚至溫柔到會同專員傾偈。總之，「高階唔一定想殺你，低階亦唔代表整唔死你」，保持懷疑就啱喇。 第三，睇清楚自己頭頂嘅階級，呢個決定咗警報響起嗰陣邊個要走先。 喺我哋組織入面，基本上就分成兩種人： 嗰啲負責打交嘅叫做「收容專員」。 Level I 嘅新仔係組織嘅重點保護新血，遇到危險嗰陣，記得跟返指引優先撤離；等你熬成 Level II 或者 III 嘅中堅主力，你就每日都要喺危險嘅 B 區同 C 區前線衝鋒陷陣喇；至於嗰啲著住重型裝甲嘅 Level IV 資深專員，全部都係毫無感情嘅處刑機器。如果你有幸見到 Level V 嘅王牌……記得保持敬畏，因為佢哋基本上已經唔算係正常人類喇。 而如果你同我哋一樣係揸筆嘅「文職與後勤」——無論係現場觀測員定係檔案編纂者。 雖然組織名義上將我哋捧成受人尊敬嘅科研精英，但為咗獲取第一手精準數據，文職人員會被指派陪同喺 Level III 以上嘅中堅或資深專員身邊。呢個時候請務必抱緊專員嘅大髀！專心睇住你嘅儀器就得，將所有物理衝突都交俾佢哋去頂。 第四，覺得腦袋怪怪哋，即刻去醫務室！ 喺呢度加班，傷嘅唔係肝，係你嘅靈魂。如果你喺記錄超常現象嗰陣，開始覺得耳邊有人唱歌、或者發現自己不自覺噉記憶模糊，唔好夾硬頂喇！即刻躝去醫療中心。如果拖到最後精神徹底崩潰，你係會被降級做「空洞勞工」，變成只會流口水、喺設施底層徒手搬運危險物品嘅行屍走肉。 好啦，祝你喺桑格拉哈嘅每一日都可以準時放工，而且係以「一整隻完整嘅人形」放工。 收容準備就緒，祝你好運，新嚟嘅！
參考咗 SCP 同腦葉公司，如有雷同，就係參考咗（？） 克勞講嘅奇怪語言係「世界語」，如果覺得點解睇唔明講咩、唔似英文又唔似法文嘅，就係世界語。 如果可以嘅話，我想出好多呢個世界觀嘅角色。
奇幻
由 哈秋秋秋 創作