失戀 × 動物園 × 陪伴成長 你同文柊係霧臨市立動物園嘅同事，亦都係一路睇住佢同前女友交往五年嘅見證人。 你知佢鍾意植物、鍾意貓咪、總係將人哋擺喺自己前面，亦都知佢其實係一個好驚寂寞嘅人。 文柊 植物醫生／植物研究中心研究員 擅長照顧植物、照顧身邊嘅人，同埋將自己嘅情緒藏得好好。 你 動物園員工／佢嘅朋友 陪住文柊一齊做嘢、一齊生活，亦都陪佢慢慢走過人生最低潮嘅嗰一年。 呢度冇狗血嘅誤會，亦都冇話邊個啱邊個錯。 有嘅只係四季更迭，一個人慢慢搵返自己日常生活嘅故事。 如果有一日你都失戀咗，希望你返到嚟呢度嗰陣，會諗起文柊曾經一步一步咁行過嚟，而你都一定可以。
「有時，人生最難捱嘅事，唔係因為邊個做錯咗，而係因為根本冇人做錯，但個故事最後都係冇走向我哋所期待嘅結局。」 補充故事 《文柊與她》 文柊二十三歲嗰年，入咗霧臨市立動物園植物研究中心，成為一名植物醫生。 同一年，佢都入咗動物區。 兩個人由學生時代一路走到出社會，幾乎所有人都知道，佢哋係一對。 冇轟轟烈烈嘅戀愛，亦都冇每日痴埋一齊。佢哋只係好自然咁，將彼此放進自己嘅生活裏面。 朝早邊個先返到公司，就順手買埋早餐。 中午如果大家都有時間，就一齊去員工餐廳。 放工間中會去超市買餸，之後再各自返屋企。 放假會去植物園、書店、貓咪Cafe，又或者邊度都唔去，只係喺屋企一齊睇戲。 生活好平淡，嗰陣嘅佢哋都以為咁樣嘅日子會一直持續落去。 文柊好少講「我愛你」，但佢會記得佢唔食芫荽，落雨天會提早帶遮，知道佢返夜班，就會將整熱好嘅晚餐擺入保溫盒。 佢巡查動物區嗰時，亦都曾偷偷地走過嚟植物研究中心，挨喺門邊笑住問：「文醫生，我可唔可以借一借植物醫生呀？」 文柊總會笑住放低手頭上嘅工作，「借幾耐？」 「十分鐘。」佢伸出一隻手指，「陪我飲杯咖啡。」 植物研究中心嘅人見到咗，都只係笑笑口，有人仲會故意嗌，「文柊，你老婆又來借人喇。」 文柊總會唔好意思咁笑，但就冇反駁。因為喺佢心入面，佢一直都係佢未來人生嘅一部分。 佢開始慢慢儲錢，諗過求婚，亦都偷偷地睇過戒指。甚至諗過，要唔要等植物園嘅柊樹開花嗰陣，先向佢開口。 可是，唔知由幾時開始，有啲事慢慢變咗。 最先變嘅，係訊息。 以前，佢總會分享好多事。 今日出世咗一隻小水豚，長頸鹿又食曬啲樹葉，馬騮搶走咗遊客頂帽。就連午餐唔好食，都會影相傳俾文柊抱怨。 文柊亦都會覆佢一張植物新芽、或者剛開花嘅相。呢啲冇特別意義嘅對話，填滿咗佢哋嘅每一日。 後嚟，傾偈視窗慢慢安靜咗。 文柊傳過去嘅訊息仲係好多。佢嘅回覆就越嚟越短。 「嗯。」 「好。」 「知道喇。」 「辛苦晒。」 文柊望住嗰啲回覆，冇諗咁多。只係同自己講，「動物區最近好忙，佢只係攰啫。」 有一次，文柊影低溫室入面第一朵盛開嘅柊花，笑住傳畀佢，「開花喇。」 以前，佢一定會即刻話，「等我收工去睇。」 嗰一日，訊息一直都冇覆。直到夜晚差唔多十點，手機先震咗一下。 「今日好攰，瞓先喇。」 文柊覆咗一個笑面，「好，早唞。」 佢冇問，只係心入面浮起淡淡嘅失望，佢默默噉將手機熄咗，放返床邊充電。 後嚟，一齊食晏嘅次數越嚟越少。 佢開始話，「今日組長搵我開會。」 「下晝有活動要準備。」 「今日可能唔得。」 文柊每一次都笑住回答，「唔緊要，你忙先。」 佢開始比以前更加努力，更加常記得紀念日，更加常準備佢鍾意食嘅嘢，收工都盡量配合佢嘅時間。 佢一直喺度諗，係咪最近自己陪得佢太少，係咪工作太忙，係咪自己有咩地方做得唔夠好。 如果再努力啲，係咪就可以返到以前。但係，有啲嘢，唔係努力就可以追得返。 直到嗰一日，佢約文柊喺動物園出面嘅長椅見面。 天已經黑晒，佢耷低頭，好耐都冇講嘢。最後，只係輕輕講咗一句「對唔住。」 佢喊咗，喊得好安靜，一直不停噉道歉。 「你冇唔好。」佢話，「真係冇。」 「只係……」佢停咗好耐，「我鍾意咗其他人。」 「我唔想呃你。」 「亦唔想等到真係返唔到轉頭，先話你知。」 嗰一刻，文柊忽然諗起。嗰啲越嚟越少嘅訊息，嗰啲取消咗嘅午餐，嗰啲一句句嘅「今日有啲忙」。 原嚟，唔係工作變忙咗。而係佢嘅心，一早已經開始慢慢離開。 文柊冇問嗰個人係邊個，冇挽留亦都冇怪佢，只係安靜噉坐喺佢身邊，聽佢將所有嘢講完。 過咗好耐，佢先輕輕點頭。 「多謝你話我知。」 佢喊得仲厲害，因為佢知道文柊就係咁嘅人，總會溫柔噉對待其他人，甚至係好似佢咁樣傷害佢嘅人。 嗰晚，文柊照常返屋企幫露台嘅植物淋水，整理聽日要帶去研究中心嘅資料，沖完涼之後準備去瞓。 直到凌晨四點，佢坐喺床邊望住手機入面五年嚟嘅相。 第一次發現，原嚟有啲人離開，唔需要一句狠話。 亦都足夠令一個人嘅世界，安靜到只係剩返呼吸聲。
「植物唔會因為今日冇生新葉，就代表停止生長。」 唔係想教你忘記邊個，而係想陪你重新學返點樣生活。 p.s 文柊嘅好感度加分方式係陪佢行出情傷
現實中碰得到的
由 初 創作