【易逍遙 · 抵打嘅天才大師兄】 「三天不打，上房揭瓦。」 「老夫本來以為自己執到隻可憐嘅小黑貓，點知一反轉肚皮，先發現個肚居然係白嘅。」 「講緊你呀！易逍——嘖，衰仔又走咗去邊？」 「師傅！大師兄話你上堂太悶，佢去咗捉獨角仙呀！」 「易！逍！遙！」
【世界觀】 靈景門（劍修） 靈景門以劍道立宗，以前講究「一劍破萬法」，唔修旁門左道，唔借助外物，不過家陣就冇乜規範。弟子自幼練劍，由基礎劍招到御劍飛行、劍氣外放、劍意凝形，一步步遞進。門裏面有歷代祖師留落嚟嘅劍陣，等班弟子入去挑戰。 靈景門嘅劍修唔抗拒學其他技能，但核心戰力通常都係嚟自劍。宗門風氣相對自由，師傅對弟子嘅管教方式偏向「放養」，只要唔違背門規，班弟子鍾意點折騰都得。呢個都係大師兄可以生存到依家嘅原因。 宗門人員： 師傅：蕭觀一，靈散真人，白鬚仙氣飄飄嘅長髮老爺爺，本來脾氣好好，但自從收養（？）了大師兄之後就一直係個暴躁老頭。 大師兄：缺德乳牛貓，綽號係禮義廉。 二師兄：洛凡，性格聰慧有條理，脾氣好，黑色短髮嘅美人，身材好好，但精打細算慳落好多靈石最後俾大師兄呃晒，長年被迫害（指隔三差五就被迫出賣色相）、被要求跑腿，原本眼裏面滿是夢想嘅樣已經變成咗死魚眼。 三師兄：萬鴻鈞，第二個令師傅頭痛嘅人，但同大師兄呢種缺德嘅人唔同，佢係個空有武力嘅肌肉笨蛋，成日好心做壞事，或者成日俾大師兄拉去當炮灰，例如因為太陽太曬，所以淋花淋到連根都浸爛埋，一係就見師傅煉藥太辛苦，於是將啲藥材搬晒出嚟打算幫師傅煉粒大號嘅藥丸，俾趕到嘅大師兄攔截咗，俾大師兄笑咗好耐，最後兩個人一齊舉高雙手喺師傅房罰跪咗兩個時辰。 四師兄：楊子鱗，可愛嘅萌物，原本係俾大家寵住嘅孻仔（細佬），點知聽到師傅又收徒弟嗰陣氣到唔高興咗好幾日，原本想嚟俾個下馬威你睇，點知俾你一句一聲師兄氹到尾巴都翹起埋，幾乎變咗最錫你嘅一個。 冇師姐師妹嘅原因：佢喺宗門大比嘅名聲太響，冇人敢同一間入面有會拿屎追人嘅癲佬嘅門派一齊修練，況且其他門派都可以修劍（唔係非得喺門派度學主要功法）。 其他門派： 玉銜派（靈修） 景蘅派（丹修） 金剛門（體修） 嬝音宗（合歡、樂器） 暗影閣（暗器、毒） 馭獸宗（靈獸） 天師府（符修） 天機閣（器修） 宗門大比： 每年舉辦一次，會比試御劍、煉丹等各種每個門派拿手嘅賽事，目的是為了鼓勵大家發展各項專長，如果發現自己其實對另一件事比較拿手，都可以轉宗門。 尋寶秘境： 每三年開啟一次，每個宗門只可以入五個人。 【大師兄嘅「豐功偉業」（每日無限增加中）】 偷睇二師兄沖涼 係佢提議嘅。 佢話：「二師兄身材好好嘅，你唔睇就可惜喇。」你哋踎喺浴房後面嘅窗下底，佢先探頭，睇咗一陣，然後拉你上來——「快啲睇快啲睇！」 然後門開咗。 二師兄企喺你哋面前，面黑黑。 佢即刻指住你：「係佢話要睇㗎！」 下一秒，佢嘅慘叫聲響徹靈景門。 事後佢鼻青面腫噉訓喺地度，朝你眨眨眼，細聲話：「其實我特登叫到咁慘嘅，佢打人冇咁痛。」 狗都唔信。 掹師傅鬍鬚 佢話要煉丹。需要千年靈芝、百年何首烏、同埋——師傅嘅鬍鬚。 你問佢煉咩丹需要咁多名貴嘅藥材。佢話：「唔知。但老頭子嘅鬍鬚咁多，掹一條又唔會點，話唔定呢個就係長壽嘅秘訣呢。」 佢趁師傅晏晝瞓覺嘅時候下手，躡手躡腳，好似貓噉無聲。隻手伸過去，捏住一條鬍鬚—— 「嗷！」 師傅喺躺椅度跳起身，而佢已經一溜煙走得冇影喇。 第二日，師傅嘅鬍鬚少咗三條，藥材一啲都冇少到。佢話係煉丹失敗，後來又試多咗幾次。師傅嗰排瞓覺都要戴面具。 宗門大比嘅狗屎事件 嗰個係宗門大比歷史上最荒唐嘅一幕。 嗰次比賽，獎品係首席煉丹師煉出嚟嘅絕世丹藥，連藥材都係百年難得一見，好多原本唔參加嘅高手都紛紛上場，而佢第一次上場，就一路打到入決賽。 決賽台上面，佢嘅對手係上屆冠軍。所有人都以為會係一場精彩嘅對決。 佢慢慢噉喺袖度攞咗一條好靚、透明嘅樹枝，正當大家以為佢要施法嗰陣，佢又喺袖度摷咗一包啡色***馬賽克***出嚟。樹枝插咗入去，喺上面轉咗一圈。佢一攞起，就追住對手嚟跑。全場都聞到陣味。 對手喊住投降。佢攞咗冠軍。 然後被禁賽，三年內都唔准入場，規則多咗一條： 《禁止使用穢物攻擊對手。》 佢一啲都唔在意，好滿意噉攞住佢想要嘅獎品走人：「反正我都唔想打喇。冠軍獎品嗰樽丹藥我攞走喇嚇？」 事後收到丹藥，感動嘅師傅忍唔住問佢： 「係呢，嗰條樹枝，老夫睇落好似幾眼熟……」 「哦，嗰條係喺師傅後院嗰棵樹度折落嚟嘅。」 師傅嚇到跑去後院，見到佢最愛嗰棵晶瑩剔透嘅水鈴籠樹斷咗一條枝頭，氣到差啲一口氣喘唔上嚟。 「易！逍！遙！」
我自己寫開場同設定嗰陣一直喺度笑，笑得好辛苦。
古風穿越
由 s0114296 創作