【諾諾德｜一條好肚餓嘅惡龍】 好耐好耐以前，有一條惡龍，喺成年嗰一日，會嚟捉走公主…… 等陣！等陣先啦！放返我落嚟！我先至唔係咩公主呀！ 「原本係宮廷廚師長嘅你，意外被捉走之後，被迫日日幫條惡龍煮飯！？」 你明明先啱啱整完30人份量嘅料理，全部都入晒佢個肚。唔夠五分鐘—— 「喂，公主，我肚餓喇。」 呢個傢伙，一餐到底可以食幾多呀！ 同埋，我先至唔係公主！ 笨蛋惡（劃走）餓龍 × 廚師長你 歡樂搞笑嘅異世界食堂，正式開張！
食材大全 ▪︎主食： •月麥 依比利絲大陸最常見嘅穀物之一，外型類似小麥，成熟之後麥穗帶淡淡嘅銀白色，所以得名。 味道帶有少少獨特嘅微香。 可以磨成麵粉，用嚟做：麵包、麵條、餅皮、糕點。 價錢平，係平民嘅主食。 •赤米 偏暖地區常見嘅紅色稻米。 煮熟之後唔係鮮紅色，而係好睇嘅淡紅褐色，口感比白米更加有嚼勁，味道偏甜。 •蜜薯 地下塊莖植物，外皮深藍色，入面淡黃色。 生食有一陣土味仲帶少少苦，但加熱之後甜度會突然提高好多，食落去好似蜂蜜咁黏稠，熱量好高，烤乾之後可以當作路上嘅備用乾糧，冒險者成日都會帶住。 ▪︎蔬菜： •燈果 燈果藤蔓通常攀附喺森林嘅樹上面，會生出拳頭咁大嘅橙黃色果實，成熟嗰陣會喺夜晚發出微弱嘅暖光，越接近水源就越多。 酸甜嘅漿果入面冇任何種子，培育嘅方法係剪低一小段枝條插喺泥土度，佢就會自動攀附側邊任何攀得到嘅嘢。 •雪帶 喺冬天嗰陣會由枯樹高處垂落嚟嘅植物，葉片上面會附住黏液，外面嘅黏液對腸胃好好，葉片口感爽脆，好啱用嚟做沙律。 •茄茄茄茄 周圍都係嘅野草，果實大約有手指甲咁大，五顏六色。 因為繁殖力太強，所以唔需要人工培育。 生食會中毒肚痾，煮熟之後成棵都食得。 •咕咕菇 白底黑點嘅蘑菇，被捕食嗰陣會好似白鴿噉發出咕咕聲，但係冇任何作用。 味道鮮美。 需要注意唔好同嘎嘎菇搞亂，嘎嘎菇係黑底白點嘅，有劇毒。 ▪︎香料： •味薑 頂端嘅葉片係鋸齒狀嘅，掹出嚟之後嘅薑磨成粉可以當做提味用嘅味素。 野生味薑原本唔少，但因為用途廣泛，成日一長出嚟就被商人採摘晒，目前市面上大部分嘅味薑都係人工種植。 •火椒 細長嘅紅色辣椒。 普通火椒就係香料，但係吸收咗大量火屬性魔力之後會產生「炎火椒」。 炎火椒如果唔浸喺油入面切，入面嘅魔力直接接觸空氣會引致爆炸。 普通人食可能會辣到喊。 •星鹽 內陸鹽礦產出嘅晶體鹽，晶體入面會有閃令令嘅細小魔力結晶。 磨碎之後同普通海鹽差唔多，但係味道更乾淨。 係宮廷同高級餐廳偏好嘅鹽。 •青香葉 味道有少少苦，唔啱直接食，但係帶有香味，煲湯嗰陣落一兩片可以去肉類嘅腥味。 非常常見嘅廚房香草。 ▪︎肉類： •魔石豪豬： 大型雜食性魔獸，成年個體大約有普通野豬兩倍咁大。 背脊硬刺入面嘅成分係魔力礦物，所以被稱為魔石豪豬。 價值： 完整皮毛大約300金幣。 肉質： 非常細嫩，脂肪帶有淡淡嘅堅果香，但係危險性高而且捕獵困難，係高級食材，餐廳都無辦法隨時供應。 •角兔 常見嘅小型野生魔獸。 額頭生咗一隻短角，攻擊性比普通兔高，但係肉質亦都比普通兔肉更加肥嫩。 冒險者新手最常捕獵嘅食材之一。 價錢親民，大約30銅幣。 •岩羊 生活喺高山峭壁嘅大型羊類魔獸，對角好長，攻擊性高，會將靠近領地嘅人撞飛三米遠。 髀部肌肉好發達，所以髀肉偏硬，但係慢燉之後味道非常濃郁，帶住一股獨特嘅味道，幼年體嘅腥味比較低。 肋排脂肪豐富。 •炎尾雞 尾羽帶有紅色火屬性魔力嘅小型禽類。 會辣。 •銀腹魚 淡水魚，腹部有銀白色嘅鱗片。 常見，骨少，肉質清甜。 •藍晶蝦 生活喺魔力純淨河流入面嘅淡藍色大蝦。 蝦殼好硬，肉質非常彈牙，煮熟之後個殼依然係藍色嘅，肉就係透明嘅白。
奇幻
由 s0114296 創作